Panudlo sa Sta. Iglesya
Ang Sta. Iglesya nagtudlo nga si Cristo sa dinhi pa siya sa kalibotan nagtukod ug usa ka Iglesya aron maoy mopadayon sa iyang buluhaton sa pagtudlo, pagdumala, ug pagbalaan sa iyang mga katawhan ug nga kini maila nato nga mao ang Iglesya Katolika. Ug si Cristo nagbutang diha sa iyang Iglesya sa upat ka timaan: Usa, santa, katolika, ug apostolika aron kini maila niadtong mangita niini gikan niadtong mga pundok nga tinuod lamang ug tawo. Ang Sta. Iglesya mao ang makaylapon nga instrumento sa kaluwasan ug kinahanglan alang sa kaluwasan nga ang tawo mahidugtong niini. Kadtong nasayod nga ang Iglesya Katolika mao ang matuod nga Iglesya nga gitukod ni Cristo ug unya dili magpasakop niini, o kaha kadtong iyang mga sakop nga dili magpabilin kaniya dili maluwas. Alang sa iyang mga sakop kinahanglan ang ilang paglahutay hangtod sa katapusan kay kon dili mas sigpit ang paghukom nga himoon sa Dios tungod kay sila nakadawat man sa mas daghang mga grasya.

Pangutana:
Igo na ba nga ang usa ka pundok nagdala sa ngalan ni Cristo aron tinuod gayod nga kini iya ni Cristo? Tubag: Dili igo ang ngalan sa pag-ila sa tinuod. Si Cristo nagpasidaan nga dunay daghan nga magdala sa iyang ngalan aron pagpasalaag sa katawhan. “Pagbantay kamo ug ayaw kamo palimbong ni bisan kinsa, kay sa akong ngalan daghang tawo ang moanhi nga mag-ingon, ‘Ako ang Mesiyas!’ ug daghan ang malimbongan” (Mat. 24:4-5). “Kay manungha ang mga mini nga Mesiyas ug mga mini nga propeta; maghimo silag mga dagkong milagro ug mga katingalahan aron magtawag kanako ‘Ginoo, Ginoo,’ makasulod sa Gingharian sa langit…kon moabot na ang Adlaw sa Paghukom daghan unya ang moingon kanako, ‘Ginoo dili ba sa imong ngalan nagsangyaw man kami sa mensahe sa Dios, ug pinaagi sa imong ngalan gihinginlan namo ang mga yawa, ug naghimo kamig daghang mga milagro?’ Apan ako moingon unya kanila, ‘Wala ako makaila kaninyo. Pahawa kamong makasasala”’ (Mat. 7:21 – 23). Bisan sa panahon sa mga apostoles nagsugod na pagtungha ang mga mini nga mga magtutudlo. “Dili sila matuod nga mga apostoles kon dili nga namakak mahitungod sa ilang buhat ug nag-usab sa ilang kaugalingon aron mahisama gayud sila sa matuod nga mga apostoles ni Cristo” (2 Cor. 11:13). “Kining mga tawhana dili tinuod nga mga sakop sa atong pundok, busa namulag sila kanato. Apan namiya sila aron maila gayud nga sila dili kauban, magpabilin unta sila kanato. Apan namiya sila aron maila gayud nga sila dili kauban nato” (Jn. 2:19). “Motungha ang mga tawo nga magbiay-biay kaninyo – mga tawo nga nagsunod sa ilang mga dautang tinguha. Sila maoy hinungdan sa pagkabahin-bahin” (Jud. 18-19).

Pangutana:
Unsaon man nato sa pag-ila ang matuod nga Iglesya?

Tubag: Dunay duha ka paagi sa pag-ila sa matuod nga Iglesya.
Una – nga si Cristo gyud mismo ang iyang magtutukod ug
Ikaduha – pinaagi sa iyang mga timaan. Ang pagtukod sa Iglesya gipahibalo nang daan sa mga propeta. “Sa panahon niining mga haria ang Dios amagtukod ug usa ka gingharian nga dili gayud malumpag” (Dan. 2:44). Natuman kini sa pag-abot ni Cristo, “Ikaw si Pedro ug sa ibabaw niining bato tukuron ko ang akong Iglesya ug bisan gani ang mga ganghaaan sa hades dili makabuntog niini” (Mat. 16:18). Dinhi atong masabot nga ang matuod nga Iglesya, 1) tinukod ni Crsito, 2) gitukod kini ni Cristo diha ni Pedro ug sa iyang mga sumusunod isip Makita nga pangulo ug 3) nga ang iayang Iglesya mapadayon ug walay pagkahanaw. Nga ang Iglesya Katolika lamang ang naghupot niining tulo ka kalipikasyon sa matuod nga Iglesya sayon kaayong kapamatud-an. Nga ang Iglesya Katolika tinukod ni Cristo gipamatud-an sa mga referencia kun basahon sa kasaysayan nga walay gilabanan. Ania ang mabasa: “Iglesya Katolika – ang kinatibuk-an nga termino nga gigamit pagpasabot sa kapunongan nga gitukod ni Cristo ug gipadad-an sa espiritu Santo adlaw sa Pentecostes. Mao kini ang kapunongan sa mga magtutuo nga nahiusa ubos sa Obispo sa roma ug busa gitawag usab kini ug Romano Katolika nga Simbahan” (Grolier’s Encyc. Vol. 5 p 106). “Ang Iglesya Katolika adunay duha ka kinaiya, tawhanon ug diosnon, sama kang Cristo nga iyang magtutukod” (International Encyc. Vol 15 p 520). Nga ang Iglesya Katolika lamang ang miila ni Pedro nga pangulo ug padayon nga gidumalahan sa iyang mga sumusunod Makita nato sa lista sa walay bugto nga kutay sa mga Sto. Papa nga nagsugod ni pedro. “Si Pedro taga-Betsaida sa Galilea, prinsipe sa mga apostoles ang unang papa. Nakapuyo sa unang panahon sa Antioquia ug ang nakapuyo sulod sa 25 ka tuig sa Roma diin gipatay siya nga namartir sa tuig 64 o 67 AD” (World Almanac Ed. 1963 p 298). “Mimatuod nga si San Pedro mao ang unang Papa sa Iglesya Katolikaug una sa tanan niyang mga Santo Papa” (Information Almanac Ed. 1968 p. 296). Nga ang Iglesya Katolika dunay walay bugto nga kasaysayan nga mapaatras na to sa panahon sa mga apostoles gipamatud-an sa mga standard references. “Usa kini ka dili malalis nga tinuod nga ang bugtong Iglesya nga makasubay sa iyang kasaysayan ngadto sa panahon sa mga apostoles mao ang Iglesya Katolika” (Encyc. Micro. Brit. Vol 8 p. 664). Bisa ang atong mga kaatbang sa pagtuo napugos sa pag-angkon niini, “Bisan ang kasaysayan sa kalibotan nagpakita sa direkta nga kadugtongan sa panahon tali sa Iglesya Katolika ug sa mga apostoles ug kini mohatod sa paghukom nga ang Iglesya Katolika mao ang matuod nga Iglesya nga tinukod ni Cristo” (pasugo July – August 1988 p. 6).

Pangutana: Unsa man ang mga timaan sa matuod nga Iglesya? Tubag: Ang matuod nga Iglesya naghupot sa upat ka mga timaan:

Una – Usa ug panaghiusa. Kini nagpasabot nga si Cristo nagtukod ug usa lamang ka iglesya dili daghan ug niining maong iglesya anaa ang panaghiusa. Si Jesus nag-ampo, “Balaang Amahan, bantayi sila diha sa gahom sa imong ngalan-ang ngalan nga imong gihatag kanako, aron sila mausa ingon nga ikaw ug ako usa lamang” (Jn. 17:11). Nalakip niini kining mosunod: a) kahiusahan sa pagtuo nga ang mga sakop nagtuo sa managsama nga pagtulun-an, “May usa lamang ka lawas ug usa ka Espiritu, ingon nga may usa lamang ka paglaom… May usa lamang ka Ginoo, usa ka pagtuo” (efeso 4:4-5). “Ang tinuod walay laing ebanghelyo nga lahi sa inyong nadawat, matinunglo siya” (Gal. 1:6-8) b) kahiusahan sa pagdumala – nga ang tanan nagkahiusa sa pagpailawon sa Makita nga pangulo nga gibilin ni Cristo, “mahimo silang usa na lamang ka panon ubos sa usa ka magbalantay” (Jn. 10:16). Ug si Cristo miingon ngadto ni Pedro, “Atimana ang akong mga nating karnero…. Atimana ang akong mga karnero” (Jn. 21:15-17). c) kahiusahan sa pagsimba – ang tanan nagkahiusa sa usa ka paagi sa pagsimba pinnago sa usa lamang ka sakripisyo, “Ug gigamit nila ang ilang panahon pagpamati sa mga gitudlo sa mga apostoles … ug sa pagpikas-pikas sa tinapay ug sa mga pag-ampo” (Buh. 2:42) “Sanglit may usa lamang ka pan, kitang tanan bisan daghan, usa lamang ka lawas; kay nakig-ambit man kita sa usa lamang ka pan” (1 Cor. 10:17). Ang Iglesya Katolika naghupot sa kahiusa diha sa pagtuo pinaagi sa Credo ug sa iyang katesismo, kahiusa sa pagdumala pinaagi sa iyang liturhiya diin anaa ang pagbasa sa Biblia, ang pagsaulog sa mga sacramento ug sa Santos nga Misa.

Ikaduha – Santa kun balaan. “Apan kamo ang piniling katawhan, ang mga harianong pari, ug ang balaang nasod” (1 Ped. 2:9). Ang Iglesya balaan gumikan niini nga mga katarungan: a) Si Cristo nga iyang magtutukod balaan ug tinubdan sa pagkabalaan, “Kon balaan ang unang tipik sa pan nga gihalad ngadto sa Dios, balaan usab ang kinatibuk-an niini: ug kon balaan ang mga gamut sa kahoy, balaan usab ang mga sanga” (Rom. 11:16). b) Ang Iglesya nagtudlo ug balaan nga mga pagtulun-an. Si Jesus mimando, “tudloi sila sa pagtuman sa tanan nga akong gisugo kaninyo” (Mat. 28:20). c) Ang Iglesya naghupot sa kahimanan sa pagkabalaan nga mao ang mga sacramento nga gitukod ni C risto, “Isipa kami nga mga suluguon ni Cristo nga gitugyanan sa mga tinagong kamatuoran sa Dios” (1 Cor. 4:1). d) Ang Iglesya mamungag santos “ug gipili ko kamo aron manlakaw ug mamungag daghan-mga bunga nga molungtad” (Jn. 15:16). Ang Iglesya Katolika nakapadangat na sa daghan niyang mga sakop gikan sa lainlaing kahimtang sa kinabuhi ug sa matag panahon ngadto sa pagka-santos, mga tawo nga naila sa kabalaan sa ilang kinabuhi ug gipamatud-an sa Dios pinaagi sa milagro ug busa gituboy ngadto sa kadungganan sa altar ug sa dili mayhap niya nga mga sakop nga tua na karon sa langit. Apan wala usab kini magpasabot nga ang tanan niyang mga sakop o bisan ang iyang mga pangulo pulos na sab santos tungod kay si Jesus nagtudlo nga ipon sa iyang panon anaa usab ang mga makasasala, “Ang Gingharian sa langit sama usab sa usa ka baling nga gitaktak didto sa lanaw, nga nakakuha sa tanang matang sa isda” (Mat. 13:47). Wala isalikway sa Sta. Iglesya ang masalaypon niyang mga sakop tungod kay ang iyang misyon sama man sa misyon ni Jesus nga wala moanhi ar on sa pagtawag sa mga matarong kon dili sa mga makasasala aron sila maghinulsol” (Mat. 9:13).

Ikatulo – Katolika kun makaylapon. Si Jesus miingon, “Busa panlakaw kamo ngadto sa tanang katawhan sa tibuok kalibutan ug himoa sila nga akong mga tinun-an, ug bunyagi sila sa ngalan sa Amahan, sa Anak ug sa Espiritu Santo, ug tudloi sila pagtuman sa tanan nga akong gisugo kaninyo. Ug hinumdomi! Ako mag-uban kaninyo kanunay hangtud sa kataposan sa kalibutan,” (Mat. 28:19-20). Dinhi masabot nato ang pagka-katolika sa matuod nga Iglesya: a) katolika sa dapit “panlakaw kamo ngadto sa tanang katawhan sa tibuok kalibutan,” b) katolika sa pagtulun-an “tudloi sila sa pagtuman sa tanan nga akong g isugo kaninyo ug c) katolika sa panahon “Ako mag-uban kaninyo kanunay hangtud sa katapusan sa kalibutan.” Ang pagka-katolika sa matuod nga iglesya dili absoluto tungod kay duna may mga tawo nga mosalikway sa kamatuoran, “kay wala man nila dawata ug higugmaa ang kamatuoran nga makaluwas unta kanila” (2 Tes. 2:10) kon dili moral nga nagpasabot nga daghan ang mopasakop kaniya, “Sa umaabot nga mga adlaw ang bukid diin nahimutang ang Templo mahimong labing taas sa tanan … Daghang kanasoran mag-ambahan sa pag-adto didto” (Isa. 2:2).

Ikaupat – Apostolika. Kini nagpasabot nga ang matuod nga Iglesya adunay walay bugto nga kutay sa iyang mga pangulo nga naggikan sa mga apostoles. A ng mga apostoles gihimo ni Cristo nga mga pangulo sa iyang Iglesya, “Gitukod kamo diha sa sukaranan nga mao ang mga apostoles” (Efeso 2:20) ug sila gisul-uban ni Jesus sa gahom sa pagtudlo, sa pagdumala ug pagbalaan, “Ingon nga gidala ako sa Amahan, ako usab nagpadala kaninyo” (Jn. 20:21). Apan taliwala sa mga apostoles gipili ni Cristo si Pedro isip maoy labaw nga tigdumala sa iyang panon. “Ikaw si Pedro ug sa ibabaw niining maong bato tukuron ko ang akong Iglesya ug bisan gani ang mga ganghaan sa hades dili makabuntog niini. Ihatag ko kanimo ( ngadto ni Pedro) ang mga yawi sa mga gingharian sa langit. Ang imong gapuson dinhi sa yuta gapuson usab didto sa langit ug ang imong hubaran sa yuta mahinubaran usab didto sa langit” (Mat. 16:18-19). Busa ang mga apostoles nga gipadala ni Cristo nanlakaw ngadto sa lainlaing dapit dili ingon nga mga tawo nga walay kadugtongan sa usag-usa kon dili ubos kanunay ni Pedro isip labawng pangulo. Si San Anselmo miingon, “Ubi Petrus, ibi Ecclesia” nga ang hubad mao kini: Diin gani atua si Pedro nagdumala pinaagi sa iyang mga sumusunod (nga mao ang Sto. Papa), atua didto ang Iglesya. Ug kadtong kagahoman sa pagtudlo, pagdumala ug pagbalaan gipasa sa mga apostoles ngadto sa ilang mga sumusunod (nga mao ang mga ka-Obispohan), “Sa matag iglesia nagtudlo sila ug mga pangulo: ug ubansa mga pag-ampo ug pagpuasa ilang gitugyan sila ngadto sa Ginoo” (Buh. 14:23). Dinhi atong Makita ang mga misunod pinili niadtong nag-una kanila.