May usa ka inilang propesor si Athanasius Kircher (d. 1680) nga walay pagtuo sa Dios nga sa iyang klase bahin sa astronomiya buot niyang tudloan ang mga batan-on sa pagsalikway sa relihiyon ug sa Dios. "Walay Dios", matud pa niya, "ang tanang mga butang nangahimo lamang sa ilang kaugalingon."

Usa ka adlaw niana, ang propesor miduaw aron sa pagsuta sa eksperimento nga gisugo niya sa iyang mga tinun-an. Usa ka tinun-an naghimo ug usa ka bantawan diin gigama niya ang adlaw linibotan sa 9 (siyam) ka mga planeta ug gipalihok ug gipasiga niya pinaagi sa dagitab. Ang propesor nalipay ug nakaingon,

"Matahom! Kinsay nagbuhat kanila?"

Ang batan-on daling mitubag, "Sir, way nagbuhat kanila."

Nasuko ang propesor ug miingon, "Ayaw ko'g tiawi sama niana!"

Ang abtik nga batan-on mitubag, "Sir, kon dili ka motuo nga way nagbuhat niining artipisyal nga uniberso, labi pa akong dili motuo nga way nagbuhat sa matuod gayud nga uniberso."

Nahilom ang propesor.

Pagtulon-an:
Kon dunay sangpotanan, dunay hinungdan, kon dunay binuhat, dunay magbubuhat, libot kanato adunay hinimo sa tawo, apan dili malalis nga adunay dili hinimo sa tawo. Ang kinabuhi, ang dagitab, ang hangin, ang mga planeta, mga bitoon, adlaw ubp. Kini sila nagtug-an ngadunay Magbubuhat nga labing Makagagahuom ug labaw kaayo sa tawo. Siya mao ang Dios, ang atong Langitnong Amahan. "Ug wala Siya, walay bisan unsa nga mahimo sa nangahimo." (Juan 1:3)