Usa ka pinangga ug buotan nga sulogoon ni Emperador Carlos V grabi nga masakiton ug gituohang mamatay. Miduaw si Emperador Carlos ug nakakita sa masulob-on kaayo niyang sulogoon, siya miingon:

"Ania ako aron sa paghupay kanimo, unsa bay nakapasakit kanimo pag-ayo? Sultihi ako, isaad ko sa ngalan sa akong korona dili gayud ako masilag kanimo bisan pa kining kasubo akoy hinungdan!"

Ang sulogoon mitutok sa emperador ug miingon. "Kadako sa sayop ko. Sukad sa sinugdan gikahalad ko kanimo ang akong katakos ug mga panahon. Kon ikauli lamang sa akong kinabuhi ang kanhi kong pagkabatan-on, dili diay ikaw ang takos kong alagaran, kondili ang tag-iya sa kinabuhi ug ang Hari nga dili mamatay, ang Dios. Apan karon, ulahi na ang tanan.!"

Nakapamalandong ang hari ug nakita niya unsa kadaghan sa mga tawo nga ubos kaniya nga naulipon diha sa hari sa yuta nga mamatay.

Pagtulon-an:
Ang mga hari ug mga pangulo sa yuta nagasaad kanato sa paraiso sa yuta nga matapos, daghan ang mihalad sa kinabuhi tungod niini, apan daw unsa pa unta ka-labaw sa atong pagtugyan sa kinabuhi alang Kaniya. Kinsa mao ang atong sinugdan ug kataposan. Ang Ginoo nagaingon, "Ako mao ang Alpa ug ang Omega, ang Sinugdan ug ang Kataposan. Ang giuhaw hatagan ko'g tubig nga walay bayad gikan sa Tuboran sa tubig sa kinabuhi." (Gipadayag 21:6)